Bible

1 大衛心肚想：「總有一日𠊎會落在掃羅个手中；𠊎最好還係逃到非利士去。恁樣，掃羅會無法度在以色列國內尋到𠊎，𠊎就做得脫離佢个手。」 2 所以大衛帶佢个部下六百人，黏時去投靠迦特王—瑪俄个孻仔亞吉。 3 大衛㧯部下帶等家族，就㧯亞吉共下住在迦特。大衛个兩個𡜵娘—耶斯列人亞希暖㧯拿霸个寡婦迦密人愛比該㧯佢共下。 4 掃羅聽講大衛逃到迦特去，就無再尋佢。 5 大衛對亞吉講：「王若看𠊎做朋友，請俾𠊎住在鄉下一個細城；僕人樣做得㧯王共下住在京城呢？」 6 所以亞吉將洗革拉城賜給大衛。對該日起，洗革拉城就屬猶大个王。 7 大衛住在非利士人个地區前後一年又四隻月。 8 該站期間，大衛帶領佢个部下去攻打基述人、基色人㧯亞瑪力人。(這兜人住在該地區已經當久了。佢等个土地遠對書珥，直到埃及。) 9 大衛就會㓾死所有个男人、婦女，又搶佢等个羊群、牛群、驢仔、駱駝，連衫褲也會搶走。大衛相㓾後會轉到亞吉該位， 10 亞吉就會問：「今晡日你去麼介所在相㓾？」大衛會講係「猶大南部」、抑係「耶拉篾部落該位」、抑係「基尼人住个所在」。 11 大衛會㓾掉所有个男人㧯婦女，毋留一儕，免得該人到迦特去報告佢㧯部下活動个情形。這就係大衛住在非利士个時常常做个事。 12 亞吉相信大衛；佢想：「大衛已經使自家个同胞以色列人惱佢，所以佢一定會一生人服事𠊎。」